زي ما وعدتكم يا بنات، ده ملخص الاكلات

السلام عليكم و رحمة الله و بركاته

زي ما وعدتكم يا بنات، ده ملخص الاكلات


دجاج بالخضار فى الكيس الحرارى (دون)
بدون اى دهون خالص
خضار مشكل
دجاج
ملح وفلفل وبهارات
الطريقة
نجهز الخضار ونقطعه. نغسل الدجاجة ونقطعها ونتبلها. نضع الدجاج فى الكيس ونضع الخضار معاه. نقفل الكيس كويس ونعمل فية عدة ثقوب بالشوكة . ندخلة الفرن حتلاقى الدجاج بينزل الماء ويستوى فية وتقريبا بعد ساعة او ساعة ونص حتلاقى الدجاج استوى واحمر كأنك محمراة بسمن بالضبط والخضار كأنه مشوى
ملحوظة: - الخضار انا مستعمله بزنجان وطماطم وبصل بس (حسب رغبتك)بدون ولا نقطة سمنة ولا زيت خالص وطالع مستوى ومتحمر وكأننا محمرينه وطعمه خفيييييييف جدا
- لازم تشيلى جلد الدجاجة قبل السوى وليس بعدها (نصيحة طبيب)
- بالنسبة للثقوب لازم بتتعمل او كمان بالمقص تقصى بوز الكيس اللى تحت من ناحية واحدة بس علشان البخار الزايد يخرج حتى كمان علشان تطمنى اقرى التعليمات اللى على العلبة من برة لكن المهم هو انك تربطى الرباط المخصوص البلاستيك اللى بيكون موجود معاها فى العلبة كويس

الكفتة بالزبادى (دون)
نص كيلو لحم مفروم- كوب زبادى - ثوم مفروم– معلقة بقسماط ناعم -
2 بصلة مفرومة- ملح- فلفل- بهارات لحمة – بقدونس مفروم
معلقة زيت - معلقة سمنة
الطريقة :
نضع اللحمة المفرومة والبصل والبقسماط والبقدونس و الملح والفلفل والبهارات و الثوم ونخلطهم كويس ثم نضع الزبادى ونقلب كويس لحد ما تبقى متماسكة وان كانت طرية قوى ممكن تحطى معلقة كبيرة كمان بقسماط ناعم ثم تعمل كور او اصابع وتحمر فى زيت وسمنة او تشوى على الشواية او توضع فى صينية تيفال ونغطيها بورقة فويل ونضعها فى الفرن لحد ماتستوى وتحمر

القراقيش (مدام وائل)
المقادير:
1 كيلو دقيق
1/4 كيلو (سمن سايح+زيت)
م ك خميرة
م ص سكر
م ك ملح
ماءدافىء للعجن
الطريقة :
نسخن السمن والزيت (اللى هما على بعض 1/4 كيلو مش كل واحد لوحده) ونضعه على الدقيق والملح نكون مجهزين الخميرة مع السكر فى ماء دافىء قليل قبل العجن ب10دقايق نضيفالخميرة للدقيق بعد فركه جيدا بالسمن ونعجن بالماء الدافىء الى ان تكون العجينة متماسكة نتركها تخمر حوالى ساعه ونصف ونبدأ العمل فيها ونفردها الاول بالنشابة ونقطع منها دوائر او سمبوسكات او اى شكل ونضعها فى صينية ونخبزها فى الفرن

تورلى خفيف (دون)
من غير ولا نقطة زيت ولا سمنة
خضروات منوعه حسب الرغبة
قطع فراخ او لحمة
2 طماطماية كبيرة
بصلة متوسطة
ملح وفلفل
الطريقة
نقشر الخضار ونقطعه . نشيل دهن الفراخ تماما ونغسلها . نعصر الطماطم وممكن نعصر واحدة ونبشر التانية
نقطع البصلة او نقطعها شرائح . نضع الفراخ ثم الخضار ثم عصير الطماطم فى طبق فرن ونرصص شرائح الطماطم على الوش ونغطى الصينية بورقة فويل حوالى نص ساعة وبعدين نشيل الورقة لحد ما الصينية تكمل
السوى وبالهنا والشفا

بورجر بيورية (دون)
وحدات من البورجر بالعدد المطلوب
5 وحدات من البطاطس
بيض
فنجان صغير حليب
بقسماط ناعم
ملح وفلفل
زيت للتحمير
الطريقة
نسلق البطاطس ونقشرها ونهرسها كويس بالشوكة او بالهراسة. نضع الحليب على البطاطس والملح والفلفل ونخلطهم كويس. ناخد قطعة من البطاطس ونبططها بايدنا ونضع بها البورجر من الناحيتين ثم نضعها فى البيض ثم فى البقسماط. نحمرها فى الزيت الغزير وبالهنا والشفا

الملوخية ( الدايت)دون)
خفييييفة بدون دهون خالص
نص كيلو ملوخية
مكعب مرق ماجى (خضروات)
معلقة متوسطة ثوم مهروس
معلقة متوسطة كزبرة ناشفة
الطريقة
نجهز الملوخية ونخرطها . نفكها فى طبق بشوية ماء . نضع الحلة فاضية على النار لحد ماتسخن ثم نضع فيها الثوم المهروس واقلبة فى الحلة واروح وضعه علية الكزبرة الناشفة واقلبهم مع بعض بس من غير الكزبرة ما تتحرق يعنى يا دوب ريحة الكزبرة حيطلع تروحى صبة كوب ماء او المرقة لحد ماتغلى كويس تروحى وضعه الملوخية وتقلبيها تقليبة وتصبيها فى الطبق وبالهنا والشفا
ملحوظة بالنسبة الملوخية الخالية الدسم: احنا كأننا بنعمل الملوخية بالعكس يعنى العادية بنعمل الملوخية الاول وبعدين بنعمل التقلية ونطشها على الملوخية لكن اللى عملناها النهاردة بنعمل التقلية الاول بدون سمن خالص
بنعتمد بس على تسخين الحلة علشان لما نضع الثوم والكزبرة يتحمصوا بفعل حرارة الحلة ووبعدين الشوربة او الماء .طعمها خفيف ومش حتفرقيها عن العادية ولو عملتيها بنفس الطريقة بالماء بيبقى طعمها حلو برضه
معلومة : عند عمل الخضار اثناء الدايت (الريجيم)طبعا الدكاترة بتمنع مرقة ماجى بالدجاج او اللحمة لكن ممكن تستخدمى مرقة الخضروات من ماجى برضه

الفيشـــــــــــار (دون)
كوب زرة صفراء
زيت
ملح
الطريقة
ضعى الزرة فى طبق و رشرشيها بزيت لحد ما تلاقى الزرة كلة بيلمع يعنى كله الزيت طاله. ضعى حلة على النار وأمسحيها بالفرشاة بالزيت وضعى فيها الزرة و غطى الحلة تمام يعنى لازم يكون الغطاء محكم . استنى شوية و أوعى تشيلى الغطاء لحسن الزرة تنط فى وشك . حتبتدى تسمعى طرقعة جوة الحلة (دة صوت الزرة كل ما واحدة
تتحول لفشار تطرقع وتعمل الصوت دة )يا دوب دقيقة واحدة وحتلاقى الصوت ابتدى يقل و شبه اختفى ، دة معناة ان الفيشار بقى جاهز. اطفى النار و استنى ثانية و شيلى الغطاء و فضى الفيشار و رشرشية بشوية ملح و بالهنا و الشفا . ملحوظة : دى طريقة بيتى سريعة للمعندهاش ألة صنع الفيشار اللى بتتباع فى الاسواق وخلى بالك ان كمية الزرة الصغيرين بيعملوا كمية فيشار كتير. ياريت لو عندك اولاد صغيرين و تخليهم يشوفوكى وانتى بتعملية حيتبسطوا قوى لما يسمعوا الفرقعة جوة الحلة و لما تشيلى الغطاء و يشوفوا شكل الفيشار ابيض وجميل

محسن الدقيق (دون)
بنستخدم محسن الدقيق علشان لو كان نوع الدقيق وحش واحنا منعرفش
....بالنسبة لمحسن الدقيق بتحطى معلقة صغيرة على كيلو الدقيق ......تمام ؟؟
لكن الخميرة بتقل النص طالما استعملنا المحسن ...يعنى لو نفترض حتستعملى كيلو دقيق..+ معلقتين خميرة
لكن لو حتستعملى كيلو دقيق + معلقة صغيرة محسن دقيق يبقى فى الحاله دى حتحطى معلقة واحدة خميرة بدل معلقتين ....
نقول كمان لو انتى طبيعى (حتستعملى الدقيق بدون محسن يبقى تحطى الخميرة بتاعتك كلها ) لكن لو حتستعملى المحسن يبقى تحطى الدقيق + المحسن + نص مقدار الخميرة اللى كان المفروض تحطيها ....
يعنى المحسن والخميرة بيكملوا بعض .....
وعلى فكرة المحسن و الخميرة لما بيشتغلوا مع بعض بيدوا نتيجة حلوة
محسن الدقيق نوعان
الاول فى صورة بودرة بيضاء ودة بنستخدمة بنفس الطريقة اللى قلتلك عليها و بيستعمل فقط للمخبوزات زى الكرواسان و العيش و البيتزا و خلافة ............
.لكن محسن الدقيق التانى
بيبقى عامل زى الفازلين و بيستعمل فقط فى الكيك و التورتة و بنضع منه معلقة اكل كبيرة على الكيكة او معلقة اكل كبيرة على الكيكة الاسفنجية ( التورتة )
محسن الدقيق بتاع المخبوزات بيبقى لونه ابيض زى الدقيق و بودرة ومحسن الدقيق بتاع الكيك والتورتة الاسفنجية بيكون لونه ابيض شفاف وشكلة زى الفازلين او الكريم الشفاف

كيكة الذرة(دون)
(البسيسة )
3 بيضات
كوب سمنة
كوب دقيق ابيض
3 كوب دقيق زرة
معلقة صغيرة فانيليا
معلقة بيكنج بودر
كوب ونص سكر
قليل من الحليب للعجن
الطريقة
اضربى السمنة كويس قوى مع السكر لحد ما يبيضوا. نضرب البيض والفانيليا كويس لحد ما يتخنوا ثم نضيفهم على السمنة والسكر المضروبين ونقلبهم كويس حوالى 3 دقايق. نضع البيكنج بودر على الدقيق ونخلطهم كويس بالمعلقة ثم نضعهم على الخليط بالراحة خالص وانتى بتخلطيهم واذا احتاجت ممكن تضيفى شوية حليب لحد ما تتكون عندك عجينة طرية تقريبا. ادهنى صينية بالسمنة كويس ونصب فيها العجينة وسوى وش الصينية كويس
ودخليها فرن متوسط الحرارة لحد ماتستوى وبالهنا والشفا

بطاطس بيورية بالخضروات (دون)
كيلو بطاطس (او حسب الصينية)- ربع كيلو لحمة مفرومة -5 بيضات مسلوقين
2 فلفلة رومى - طمطماية كبيرة - جبنة مبشورة - حليب - 2بيضة - ملح وفلفل
بقدونس مفروم .
الطريقة
نعصج اللحمة عادى بدون صلصة. نقشر البطاطس ونسلقها ونهرسها كويس ونتبلها ملح وفلفل وشوية حليب لحد ماتنعم. نقطع الفلفلة الرومى والطماطم شرائح ونفرم البقدونس . نسلق البيض ونقشرة ونقطع كل بيضة بالعرض . ندهن الصينية زيت ونضع فيها طبقة مش رفيعة من البطاطس البيورية ثم نضع طبقة من اللحمة المعصجة ثم نضع شرائح الطماطم والفلفل ورشة جبنة ثم نرصص انصاص البيض بالمشقلب بحيث يكون البياض هو اللى لفوق . نضرب البيضتين ونضعهم على نص كوب حليب والبقدونس المفروم ونخلطهم بالشوكة مع بعض ثم نضعهم على الصينية وندخل الصينية الفرن لحد ما تحمر وبالهنا والشفا

بالنسبة للكسكسى الحادق احنا عادة بناكلة بشوربة البط والبط. لكن الحلو حقولك على طريقتي بس اهم حاجة لازم الكسكسى يكون سخن اول حاجة تجيبى معلقة سمنة مش كبيرة متوسطة وتحطيها على الكسكسى فى المقلاية وتقلبيهم مع بعض كويس لحد ماحتلاقى الكسكسى لونه زهزة تروحى طافية النار وتجيبى معلقة قشطة من على وش الحليب وتحطيها الاول فى الطبق وتحطى فوقها الكسكسى السخن وترشى علية اما عسل ابيض او سكر بودرة وتروحى خلطاهم ببعض بالمعلقة من تحت لفوق وتاكلى بالف هنا وشفا . طبعا ممكن الاستغناء عن معلقة القشطة وتمشى باقى الخطوات عادى وممكن تحطى عسل وممكن سكر بودرة . يعنى زى ماانتى عايزة بس الطريقة بتاعتى طعمها جميييل ولما بيكون الكسكسى سخن وبتقلبيهم مش حتبان القشطة لكن حتحسى بطعمها بس مع الكسكسى وبالف الف هنا وشفا (ملحوظة من دون)

بالنسبة للكسكسى الحادق مش شرط يتاكل ببط ممكن يتاكل باللحمة وممكن بالخضار وبيبقى اما بتغرفية لوحدة فى طبق وفى طبق تانى الخضار او الشوربة واللحمة او بتغرفيهم على بعض يعنى مثلا ممكن تغرفية وتحطى على وشه قطع اللحمة ولما تيجى تاكلية تحطى شوربة بالمعلقة وممكن تسوى اللحمة عادى بالصلصة وتغرفيها فى طبق ومعاها طبق كسكسى او تضعى اللحمة بالصلصة على وش الكسكسى وبنقول علية يخنى الكسكسى (ملحوظة من دون)

وبالنسبة للكسكسى ياسيتى بتعملى اللى حقولك علية سيبك من اللى مكتوب على العلبة حنسوية على حمام مائى بالبخار هاتى حلة وضعى فيها ماء بس الماء متلمسش المصفاة علشان خدى بالك ان الماء لما بيغلى حيرتفع لفوق وضعى عليها مصفاة مخرمة طبعا بس تكون بقدر الامكان لابسة حلو على الحلة وتروحى جايبة شاشة وتضعى فيها الكسكسى وترشرشية بايدك بشوية ماء وتقفلى الشاشة كويس على الكسكسى وتغطى بغطاء حلة كمان وتسبيهم على النار وكل شوية حوالى كل ربع ساعة تفتحى الشاشة وتقلبى الكسكسى بالمعلقة كويس وتغطية تانى يادوب مرتين او تقليبتين وحتلاقية استوى وطرى وفرفر خلاص كدة بقى جاهز وتستخدمية سواء بالخضار او حلو بالسكر (ملحوظة من دون)

فكرة حلوة لام ابيها ورانيا بخصوص الكسكسى
ساعات وانتى بتسوية على البخار الماء اللى فى الحلة بيخلص وينشف وانتى مبتخديش بالك اقولك تعملى اية ؟؟؟؟؟؟ خلى عندك قطعه زجاج صغيرة اى قطعه زجاج وتضعيها فى الماء فطول ما الماء موجود فى الحلة وبيغلى حتفضلى تسمعى الزجاجة وهى عمالة تخبط واول ما الماء يخلص من الحلة حتلاقى صوت الزجاجة سكت وبطلت تخبط فتعرفى ساعتها انك تضعى ماء تانى فى الحلة (ملحوظة من دون)

الكسكسى الجاف (دون)
كيس كسكسى (او نصفه)
سكر بودرة
سمنة
ماء
الطريقة
نضع الكسكسى فى قطعه قماش ناعمة ومخرمة او قطعة من الشاش ونضعة على حمام مائى (مصفة حلة البخار على الحلة فيها ماء) بس بشرط ان الماء اللى فى الحلة اللى تحت مايلمسش الكسكسى وهو بيغلى وكل ربع او تلت ساعة نفتح على الكسكسى ونرشرسة بالماء ونقلبة ونغطية تانى ونستر هكذا عدة مرات لحد ما يستوى يعنى
حتلاقية بدل ما كان ناشف بقى طرى وحجمه زاد نشيلة من الحمام المائى ونتبع الخطوات لتقديمة بالسكر او بالعسل او تتركية يبرد ثم تضعية فى اكياس نظيفة وتحفظية فى الفريزر لحين الاستخدام وبالهنا والشفا

البان كيك ( كانيلونى) (دون)
كوب لبن
2 بيضة
3 معلقة كبيرة دقيق
عصاج
2طماطم كبيرة مبشورة بالمبشرة
جبنة موزاريلا او جودة او شيدر مبشورة بالمبشرة
الطريقة
ضعى الدقيق على اللبن واخلطيهم كويس و اضربى البيض بالشوكة وملح و ضعيهم على اللبن بالدقيق واخلطيهم كويس (او اضربيهم فى دورق العصير ). هاتى مقلاية تيفال بس لازم تكون تيفال وتمسحيها بس بنقطة زيت وتاخدى من الخليط اللى عندك بالكبشة الغويطة وتنزلى حاجة بسيطة فى قاع الطاسة كأنك بتعملى قرص بيض اومليت بس رفيع مش نخين واول ما يمسك نفسه تروجى قلباة على الناحية التانية وتروحى شايلاة فى طبق وهكذا تكررى العملية مع المقدار كله لحد ما حيبقى عندك حوالى 10 اقراص بان كيك. تكونى عاملة العصاج بتاعك وتبدئى تفردى قرص قرص امامك وتحشية بالعصاج وتلفية لحد ما يبقى صابع او رول او اسطوانة محشية
تكملى حشو كل البان كيك نجيبى صينية تدهنيها دهن بس بالزيت و ترصصى الصوابع جنب بعض وتجيبى الطماطم و تبشريها و تحطيها على وش كل البان كيك و بعدين تجيبى الجبنة المبشورة وتحطيها على الطماطم الميشورة وتدخليها الفرن لحد ما تحمر و بالهنا والشفا

بالنسبة لورق العنب اذا كنتى حتحشية فى نفس اليوم يبقى بتسلقيه عادى اما اذا كنتى حتشيلية فى الفريزر يبقى بتسلقى يانتالى فى ماء بس مش كامل السلق لأ يعنى يادوب تحطيه فى الماء ثوانى وتشيلية فى مصفاة لحد ما يصفى مايته وتضعية فى اكياس وعلى الفريزر وياريت لو تضعى فى كل كيس على قد الاكلة بس اللى حتسويها وبالف هنا وشفا (ملحوظة من دون)

محشي الباذنجان: اهم حاجة انك متغسليهوش علشان وانتوا بتاكلوا مايشدش بمعنى انك لو كنتى غسلتية يبقى تحشية وتديله غلوة على النار وتانى يوم تكملى سواه لكن لو مكنتيش لسة غسلتية وقورتيه بس يبقى تشيلية عادى فى كيس فى الثلاجة لكن مش فى الفريزر. وفية ناس بتغسله وتقورة وتديله تشويحة فى زيت او سمن ولما يبرد تضعه فى كيس فى الفريزر لكن انا معجبتنيش الطريقة دى لانى حسيت ان نكهه المحشى مش موجودة زى الطازة (ملحوظة من دون)

بالنسبة للعجوة بتفصصيها وبتحطيها على النار مع معلقتين سمنة وتهرسيها وتدوسى عليها بالمعلقة لحد ماتطرى وبعدين تاخدى قطع وتكوريها لكور صغيرة وتحشى بيها تقريبا لو العجوة نص كيلو يبقى تطريها بمعلقتين سمنة وممكن تحطى سنة قرفة ناعمة على العجوة بتديها ريحة وطعم حلو (ملحوظة من دون)

الخيار المخلل (دون)
كيلو خيار رفيع
2 كوب ماء
3 كوب خل
ملح ( حوالى ربع كوب)
نص راس ثوم مهروسة
ممكن شطة
وممكن قرن فلفل حامى
2 عود كرفس ( الورق)
الطريقة
نغسل الخيار ونشق كل واحدة بالطول لحد نصها . نضع الخيار فى برطمان ونصع الثوم المهروس والكرفس والشطة او قرن الفلفل. نضع الماء والخل فى حلة والملح لحد ما يغلوا ثم نضعهم على الخيار فى البرطمان ونرجه رجه ونغطية بالغطاء

صينية بطاطس خفييييييفة (دون)
نص كيلو بطاطس
دجاج او لحمة مسلوقة
عصير طماطم فرش
طمطماية مبشورة خشن
بصلة شرائح
ملح وفلفل
الطريقة
نقشر البطاطس ونقطعها شرائح ونضعها فى صينية فيها ماء لحد ماتتسلق نص سلق ثم نرمى الماء ونشطف البطاطس بماء عادى ثم نضع البطاطس والدجاج المسلوق او اللحمة المسلوقة او ممكن من غير لحوم خالص ونضع عليها الطماطم المبشورة وعصير الطماطم و شرائح البصل وملح وفلفل يادوب حتغلى وحتلاقيها استوت على طول وبالهنا واشفا
ملحوظة . 1- حتلاقى طعمها خفيف جدا وجميلة ومش حتتخن خالص
2- ولو مش عايزة تعمليها بعصير طماطم يبقى تدوبى قالب شوربة ماجى خضروات فى ماء وتضعيها على البطاطس فى الصينية لحد ما تستوى ومش حتاخد وقت خاااااااالص
3- ممكن طبعا تعمليها بدل الخضار المسلوق

كيكة بالبرتقال (دون)
3/4 كوب زبدة
1 و1/2 كوب سكر
5 بيضات
2 و 1/2 كوب دقيق
عصير برتقالة
بشر برتقالة
معلقة صغيرة مليانة بيكنج بودر
الطريقة
نضرب الزبدة كويس لحد ماتنعم ثم نضع السكر ونضرب كويس لحد ما يبيضوا ويكونوا زى الكريمة. نضيف البيض بيضة بيضة مع بشر البرتقال مع الضرب كويس. نضع البيكنج بودر على الدقيق ونضيفه واحدة واحدة على العجينة بالتبادل مع عصير البرتقال ندهن القالب بالسمن كويس ثم نضع القالب فى الفرن لحد ماتستوى
وبالهنا والشفا

بالنسبة لاكل الاطفال طبعا السن دة (سنتين او اربع سنوات) المفروض تكونى بتاكليها كل حاجة ومن اكلكم بس الموضوع عايز شطارة منك وصبر ازاى ؟؟؟ يعنى بينى وبينك الاكل بيبقى متشابه كل يوم لكن الرك عليكى انتى فى طريقة تقديمة انتى ممكن قوى تضحكى عليها ويكون الاكل هو نفسه بتاع امبارح كل الحكاية ان العيل بيزهق وخصوصا اذا كان من النوع اللى مش آكول وبيحب لاكل وممكن لعلمك يكون بتاع امبارح هو بتاع النهاردة لكن تغيرى بس نوع العصير اللى مع الاكل بمعنى تعملى مع الفطار اما كوب نسكويك او عصير برتقال او شاى يالحليب او كوب حليب المهم انها تحس ان فية تغيير على الترابيزة وبعدين انتى ممكن تعملى وحدات بيتسا مدورة صغيرة وممكن كل انواع البيض وممكن توست بلافاش او سبرد او مربى او ذبادى بالعسل او بالفواكه او جبنة شيدر تحطيها فى التوستر مع جبنة شيدر تسييح وتبقى جميلة ممكن كورن فليكس وياريت لو تلعبى فى التقديم بالزيتون والسوسيس وتعملى اشكال وممكن حليب وبسكويت بس يارانيا وفين الفول المدمس بس شيلى القشرة واهرسيه وممكن تضربى معاه صفار بيضة خلى وجبة الفطار مفيدة جدا وخفيفة جدا وممكن بدل العيش يبقى توست وبدل التوست يبقى كوواسان وجواه جبنة او عسل او شيكولاتة (معلومات و نصايح من دون)

صينية المكرونة بالبسطرمة (دون)
كيس مكرونه فرن
بسطرمة حوالى ربع كيلو(ممكن اكتر)
بشاميل خفييييييف بالشوربة مش بالحليب
جبنة ( جودة او شيدر او موزاريلا)
الطريقة
نشيل الثوم من حوالين البسطرمة وممكن تشتريها مقشرة على طول. نعمل البشاميل بنفس االطريقة بس يكون خفيف وبالشوربة(المرقة). نضع كمية من الجبنة بعد ماتطفى على البشاميل. ندهن الصينية بمعلقة بشاميل . بعد مانسلق المكرونة ونصفيها من الماء نضع نص الكمية فى الصينية ونساويها ثم نضع طبقة من البسطرمة (بس كل البسطرمة مابتكون اكتر بتكون احلى) وعليها طبقة من الجبنة ثم نضع نص المكرونة التانية وعلى الوش طيقة من البشاميل ثم نضع على البشاميل قطعة زبدة وندخلها الفرن عادى جدا لحد ما الوش يحمر وبالهنا والشفا

القطايف(دون)
كوب دقيق
كوب ماء
معلقة كبيرة خميرة جافة اوفورية
معلقة ضغيرة ممسوحة سكر
ملح
الطريقة
ضعى كل المقادير كلها فى الخلاط (بتاع العصير) واضربيهم كويس . هاتى مقلاية تيفال وامسحيها بالفرشاة بالزيت . ضعى العجينة فى كوب او بالكبشة (المغرفة ) نزلى يا دوب شوية مقاس القطايف حتلاقيها بتفقفق يعنى تعمل كور وبتبقى شكل القطايف اللى بتشتريها بالظبط بس بشررررررررط ماتسبيهاش على النار تنشف من تحت يعنى اول ماتلاقيها بتعمل الدوائر المفرغة من فوق والعجينة البيضاء اختفت تروحى شايلة القطايف وتكررى العملية لحد ما العجينة تخلص وبعدين تحشيها بكل الطرق اللى قلناها فى الملف سواء مكسرات او قشطة او كريمة او جبنة رومى وبالهنا والشفا
ملحوظة : انا مش بسيبها تخمر فى الاول علشان لو خمرت فى الاول بتتخن قوى اثناء السوى واثناء ما انتى بتعمليها لو لاحظتى انها بتخمر وتتخن تذودى شوية ماء صغيرين قوى يعنى حوالى معلقة ماء وتقلبى العجينة وتكملى عادى خالص

تشيز كيك (سمسم)
المقادير
علبة بسكوت +زبدة +لبن
دول الطبقة الاولى ويتعجنوا سوا ويوضوعوا فى الصينية
الطبقة الثانية :
كوب لبن نيدوبودرة+كوب زبادى+سكر حسب الطعم+1/4 كوب زيت
يتم خلط المقادير على بعض ونضعهم عى طبقة البسكوت ثم توضع فى الفرن لمدة 10 او 15 دقيقة حتى تتماسك
تطلع من الفرن وتترك لتبرد
الطبقة الثالثة
2 لبن بالشيكولاتة+2 بودر كريم كراميل
نضعهم على النار حتى الغليان. نضعها على الصينية براحة جدا ثم تدخل التلاجة

الارز باللبن (دون)
المقادير : مثلا 6كوب لبن _ 9 ملاعق ارز _ السكر حسب التزوق _ملعقة كبيرة جوز هند _او نص ملعقة صغيرة فانيليا _ زبيب او مكسرات مفرية او قرفة الزواق دة لزوقك و لرغبتكم .
اغسل الارز و احطة على النار وعلية ماء مغطياة ب 2سم وعلى نار هاديه حتلاقية استوى او يقرب للسوى و يكون شرب الماء . اضع علية السكر حتلاقية داب اسرع ثم اضع اللبن مع التحريك المستمر علشان مايفورش و ظبتى تانى السكر . هاتى ربع كوب ماء و زوبى فية 2 ملعقة كبيرة نشا كويس و انزلى واحدة واحدة على الارز باللبن و بأيدك التانية بتقلب لحد ما تلاقى الارز بدء يتخن ضعى الجوز الهند وقلبى و اطفى النار و اغرفية و كل مايبرد حيمسك نفسه شوية كمان . بعد ما يبرد ضعى الغطاء البلا ستيك و عللى الثلاجة و بالهنا و الشفا
ملحوظه: مقدار اللبن زى ماانتى عاوزة يعنى حتعملى كوب حتعملى اتنين حتعملى كيلو حتحطى مقدار الارز زى ما فهمنك.
1) الارز حنسلقة الاول علشان ماياخدش معاكى وقت على النار
2)خلى بالك لاتتركية على النار بعد السوى لان الارز طول ماهو على النار بيفضل يتخن و كدة يااما حتغرفية حيكون تخين او انك حتضطرى تذودى لبن فكدة خلاص حتلوصى معاة
3) اذا كنتى حتعملية للضيوف خلاص اغرفية فى الكاسات او الاطباق
*******لكن اذا كنتى حتعملية للبيت و الاولاد يبقى تحطية فى الاطباق البلاستيك اللى بالغطاء ( زى اللى بنشترى فيها الذبادى البلدى ) اشتريها بالجملة هى رخيصة جدا و خليهم عندك فى البيت للمهلبية و الارز بالبن و الجيلى
(( لان الارز باللبن بعد مايبرد تفطى العلبه بالغطاء بتاعها حتفضل عندك فى الثلاجة طرية و جميلة زى اللى بنشتريها ))
انا بحط قبل مااطفى النار على طول ملعقة كبيرة او اثنين جوز هند بدل الفانيليا ما تخافيش طعم الجوز الهند ما بيبنش لكن بيدى بياض و ريحة جميلة
للسهوله كل كوب لبن بنحط له 21/1 ملعقة كبيرة ارز اظن كدة سهل علشان ماتتقيديش بالكيلو و لا بالتر

النسبة للازانيا ممكن تتعمل من غير بشاميل بنفس الطريقة اللى انا عملتها قبل كدة وبتبقى بين الطبقات بنضع الصلصة والجبنة الميشورة فقط وممكن تحطى معلقة كريمة لبانى خفيفة بتبقى حلوة واخف من البشاميل وبالنسبة للوش بضع اخر طبقة صلصة وارش عليها جبنة بدل البشاميل لانى جربت اضع الوش صلصة فقط بدون الجبنة والبشاميل لقيت وحدات اللحمة المفرومة نشفت .(ملحوظة من دون)

وبالنسبة للجبنة البيضاء انا كنت عملتها مرتين بس وكانت سهلة وحلوة لكن والدتى هى اللى بتعملها بالمنفحة وسألتهالك وقالتلى انك لما بتحطى المنفحة لو محطتيهاش مظبوط بتبوظ منك الجبنة واهم حاجة :
ان اللبن يكون واخد درجة حرارة المطبخ والمنفحة يعنى متكنش حاجة منهم دافية وحاجة باردة وانك قبل ما تنزليها على اللبن تكونى مخففها بشوية ماء صغيرين وان انتى وانتى بتنزليها على اللبن تكونى مقلبة اللبن كويس قوى على الفاضى وبعدين تحطى المنفحة بس شوية وتقلبى وبعدين شوية وتقلبى مش مرة واحدة وايدك التانية عمالة تقلب كويس وبعد ماتخلصى المنفحة تفضلى تقلبى فى اللبن برضه حوالى 5 دقايق علشان كله يتوزع كويس (ملحوظة من دون عن الجبنة البيضاء)

ارز خفيف (بدل المسلوق) (دون)
ارز
شبت وبقدونس
طماطم طازة معصورة
ملح وفلفل
بصلة مبشورة
قالب شوربة خضروات
الطريقة
تخرطى البصل والشبت والبقدونس تخين بالسكينة وتضعيهم على الارز بعد غسلة مع الملح والفلفل وتخلطيهم زى المحشى بالضبط. ضعى الارز على النار وعلية الشوربة المزابة فى الماء او ممكن تستبدلى الشوربة بالماء فقط ولما تغلى توطى النار زى ما بتعملى الارز العادى بالظبط ولما يستوى وتطفى علية وتغرفية وتاكلية مع السلطة او الخضار او اللحوم وطعمة فى منتهى الجمال واحلى او تغيير عن الارز المسلوق

بالنسبة لحليب جوز الهند احنا كنا اتكلمنا علية قبل كدة وبيتعمل بيه حاجات كتير حتى السمك وانا لسة النهاردة كنت بعمل لحمة بالكارى وحطيتة قبل ما اطفى النار وبيبقى جميل فية منه انواع بودرة وسائل البودرة لو حتدوبية يبقى تحطى 3 معالق على كوباية الماء ولو عوزاه خفيف يبقى تحطى 3 معالق على كوبايتين المياة لكن لو حتستعملية على طول على الصوص زى انا ماعملت فى صوص الكارى بحطة بودرة على طول فى الحلة من غير ما ادوبة (ملحوظة من دون عن حليب جوز الهند)

المحشى الخفيف (دايت) (دون)
مثلا كوب ارز
حزمة شبت
حزمة بقدونس
بصله كبيرة
طماطم طازجة
ملح وفلفل
شوربة خضروات
الطريقة
بتعملية زى العادى بالضبط بس قطعى الشبت والبقدونس والبصل كبير مع عصير الطماطم (مش صلصة) والملح والفلفل وتخلطيهم وتحشى بيهم اى حاجة سواء بزنجان سواء فلفل او كرنب او حتى ورق عنب. تغلى الشوربة وتحطيها علية لحد مايستوى بيبقى طعمه خفيف جدا بدون ولا سمنة ولا زيت خااالص وبالهنا والشفا

انا كنت فاكره ان الكسبره الناشفه مش بتستخدم غير مع الملوخيه بس طلع ان في ناس بتطبخ بيها كل حاجه
معانا واحده تونسيه هنا اكلت عندها مكرونه كانت تحفه سالتها علي الصوص بتاعها قالتلي من ضمن البهارات كسبره ناشفه و كمون. انا جربت النهارده و عملت اسباجيتي و عملت صوص طلع وهمي:
قطعت بصله جوانح و خليتها تصفر علي النار و حطيت عليها (طماطم مستويه و جزره مضروبين ناعم جدااا في الكتشن ماشين) و بروكلي و مش هتصدقي باذنجان اسود مقطع مكعبات صغيره و صلصه طبعا و البهارات ملح و فلفل و كمون و كسبره و رشه كاري و طلعت حلوه مووووت (ملحوظة من رانيا سبانيش)

النهارده عملت صينيه فراخ (رانيا سبانيش)
فراخ مخليه مقطعه
التتبيله ( زبادي كتير 250 جم -خل-صويا صوص-بصله و فلفله خضرا مضروبين ناعم جدااااا -البهارات ملح و فلفل و بهار فراخ و كاري و زنجبيل و كسبره طبعا و كمون معلقه صغيره من كله ) و نسيبها حوالي ساعه كده
نقطع معاها بصله كبير و بطاطس و جزر و فلفل اخضر كله تقطيع كبير و معاهم مثلا مشروم و بروكلي وتحطيها علي النار لحد ما تستوي من غير ما تحطي مايه خالص تستوي في الزبادي بعد كده باحط معلقتين دقيق علشان الصوص يتخن شويه بعد كده حطي نصها في بايركس و رشي عليها جبنه مبشوره و حطي نص الفراخ التاني و علي الوش جبنه كتير و دخليها الفرن ربع كده. بتطلع حاجه فظيعه فظيعه

شكشوكة البزنجان (دون)
نص كميلو بزنجان اسود مكبب
2 معلقة كبيرة زيت
1/4 كيلو لحمة مفرومة( عصاج)
نص كيلو طماطم
ملح وفلفل
2 فلفلة رومى
بصلة متوسطة
الطريقة
قطعى البصلة صغير والفلفل الرومى برضه صغير والطماطم صغير. قشرى البزنجان وقطعية مكعبات صغيرة وشوحية فى الزيت ثوانى ثم ضعى علية كل الخضروات وقليل قليل من الماء لحد ما يستوا . نحضر صينية ونضع فية نص كمية الخضار ثم طبقة عصاج ثم طبقة خضار وندخله الفرن يا دوب الوش حيتحمر وممكن تضعى شرائح طماطم على وش الصينية وبالهنا والشفا

مربى المشمش(دون)
كيلو مشمش
كيلو سكر
معلقة كبيرة عصير ليمون
الطريقة
نغسل المشمش ونشيل البزرة. نضع المشمش و رشة من السكر و نخلطهم و نسيبهم لمدة يوم فى الثلاجة ( يعنى من بليل ). نضع المشمش في حله وعليه ماء يكفي لتغطيته و نسيبة يغلى علي النار حوالي ربع ساعه. تشيلى بالمعلقة اول باول الريم اللى بيظهر على الوش ثم نرفع المشمش بالكبشة من الماء.. ونضع في الماء السكر علي النار لغاية ما يتركز يعنى يتقل شويه بعد كده نضع المشمش تاني فى الحلة . نضع عصير الليمون عليهم . نسيب المربي علي النار غلوتين و لو استوت بنفس الطريقة نطفى النار . اتركها لحد ما تبرد و اضعها فى البرطمانات فى الثلاجة و بالهنا و الشفا

كنافة بالجبنة (دون)
نص كيلو كنافة
ربع كيلو جبنة ركوتا
سمنة
معلقة كبيرة سكر
معلقة كبيرة قشطة
عسل (شيرة) 2 كوب سكر / كوب ماء / نص ليمونة .
الطريقة:
نقصص الكنافة صغير بالمقص او بالكبة او نقطعها قطع صغيرة باليد. نفركها بالسمن السائح لحد ماتحسى بأيدك ان الكنافة كلها مبلولة بالسمن. نهرس الجبنة بالشوكة ونضع عليها السكر والقشطة ونفركهم ببعض. ندهن الصينية بالسمن ونضع نص كمية الكنافة ثم نضع الجبنة على الكنافة بس لاتصل الى الاطراف علشان متتحرقش وتسود . نضع نص الكنافة التانى ونضغط الاول على اطراف الصينية داير مايدور ثم نضغط بالراحة على باقى الصينية ونضع معلقة سمن سائح على الوش . ندخلها فرن متوسط الى ان تحمر (بس مش قوى ) ونخرجها من الفرن ونسقيها بالشيرة وبالهنا والشفا

الكبـــسة (دون)
لحم قطع مسلوق او فراخ – 3 أكواب شوربة اللحمة – 2 كوب أرز بسمتي اللى هو طويل الحبة و عموما انا بحب الارز العنبرى – 1 طماطماية كبيرة – 1 بصلةمتوسطةمخرطة –ملح – فلفل –نص معلقة كبيرة بهارات كبسة -2 عود قرفة – 5 فصوص حبهان -5 وحدات قرنفل – 1 فلفل أخضر رومى – 2 ليمون اسود – 2 ملعقة كبيرة زيت – 1/2 ملعقة صغيرة كركم _مكعب ماجى
الطريقة :
يقلى البصل لحد ما يصفر- نضع الفلفل الرومى المقطع قطع صغيرة يادوب لفة مع البصل- نضع الطماطم المقطعة قطع صغيرة و برضة لفة معاهم - اضع جميع التوابل اللى عندى) واقلب كلة مع بعضة تقليبة. نضع الشوربة بتاعة اللحمة عليهم لحد ما تغلى مع كل اللى فى الحلة .نحط الارز و نقلب كلة مع بعض.ولما يغلى و يشرب مايته نوطى عادى زى الارز العادى. لحد ما يستوى و على فكرة الارز دة بيبقى مفرفر.فبل ما تطفى النار بدقيقتين خدى اللحمة المسلوقة او الفراخ عندك و ادفنيها فى الارز عشان تاخد من طعم و ريحة الكبسة .تغرف الكبسة فى سيرفيس و على الوش قطع اللحم والزبيب او المكسرات

انا كنت رديت مرة بخصوص عزومة بس مش فكرة كان اية السؤال لكنى رديت انى بحب تكون كلها نواشف ففيه اخوات افتكرونى انى اقصد بالنواشف دى انها سندوتشات او ساليزون مثلا لكن انا بقصد انها تكون اكلات بدون صلصة او بشاميل او صوص انا اقصد انها مثلا تكون جلاش باللحمة المفرومة وكبيبة شامى وارز او مكرونة سريعه لاتدخل الفرن وممكن شيش طاووق وممكن كفتة وممكن فراخ بانية او بفتيك او كفتة بطاطس او بطاطس بيورية ...فاهمة قصدى ؟؟؟هو دة مثلا اللى بسميه اكل نواشف زى مثلا مثلا الصورة دى فيها ارز بالشعيرية وبفتيك فيلية وفراخ بانية او بفتيك بانية وياسلام لو معاهم ورق عنب وطبعا مننساش فى عزومات النواشف ان تكون فيها انواع كثيرة من السلطات بمختلف انواعها (ملحوظة من دون)

جمبرى بالصلصة (دون)
كيلو جمبرى مقشر ومغسول
بصلة متوسطة مبشورة
2 فلفلة رومى مخرطين
ملح وفلفل
نص كيلو طماطم معصورة
معلقة صلصة
معلقتين زيت
الطريقة
نضع البصلة مع الزيت على النار لحد ما تطرى بس ثم نضع الفلفل الرومى برضه تقليبة ثم نضع الجمبرى ونقلب نقلب لحد ما لونه يتغير ويزهزه نضع الصلصة وعصيلر الطماطم والملح والفلفل ونتركهم لحد ما الجمبرى يستوى وممكن طبعا اذا احتاجت ماء نزود شوية فى شوية لحد ما يبقى تخانته مثل الصورة ويقدم ساخن مع الارز الاحمر وبالهنا والشفا

الارز الأحمر (دون)
عدد اكواب الارز حسب عدد افراد الاسرة
بصلة متوسطة مخرطة
نص كيلو عصير طماطم
زيت
ملح
الطريقة
نغسل الارز عادى .نضع الزيت فى الحله لحد ما يسخن ونضع البصلة المخرطة لحد ما تدبل فقط .نضع عصير الطماطم ونسيبه شوية لحد مايغلى .نضع الارز ونكمل بالماء عادى لحد ما يغطى سطحة ب 1 سم زى الارز العادى ونضع الملح ونقلبه لحد ما يغلى ويشرب مايتة ونوطى عادى لحد ما يستوى وبالهنا والشفا

الارز الاحمر اللى عملناه ممكن يتاكل بأية ؟؟؟؟؟؟؟؟؟؟؟ بيتاكل بالبيض وبيبقى طعمه جميل جدا بعد ما تغرفى الارز تكونى سلقة بيض حسب ما اللى بياكل بيحبه .يعنى لو بيحبه قوى يفرفط على الوش بيض كتير ولو عادى يفرفط بيضة ولا بيضتين وطعمه جميل جربوه مش حتخسوا حاجة وممكن الاطفال (اضافة من دون)

بالنسبة للرز الأحمر انا باعمله كالآتي (ام ابيها)
2 كوب رز مصري مغسول كويس
3 حبات طماطم مقطعة قطع صغيرة
3 حبات فلفل حامي لو بتحبيه حامي
بصلة متوسطة مقطعة قطع صغيرة خالص
حمري البصلة في حوالي 3 معالق زيت كبيرة لحد ما تذبل ولونها يصفر ضيفي لها الطماطم والفلفل المقطع قطع صغيرة وقلبيهم على النار وهدي النار لحد ما تحسي الطماطم ذبلت وبكت ميتها وتقريبا اتسبكت يعني لونها اغمق تروحي حاطة الأرز المغسول عليها وتقلبي كويس وبعدين تزودي مياه لحد ما تغطي الأرز يدوبك تغطيها بحيث لو حطيتي المعلقة فوق وش الأرز تكون متغطية بالمية وتحطي الملح، لما المية تغلي وتتشرب يعني تحسي انها قلت في الحلة خالص توطي على الأرز على نار هادية وبياخد زى تقريبا 15 دقيقة ، لو حسيتي انه محتاج مية ممكن تنثري عليه شوية مية صغيرة
في ناس بتعصر الطماطم بدل ما تقطعها صغير زى ما تحبي الفرق ان طريقتي الطماطم بتكون باينة في الأرز اما لو معصورة مش هتشوفيها هتشوفي لونها بس

صينبة المسقعه بالبشاميل (دون)
المقادير:
كيلو بزنجان اسود مكبب او حوالى 2 كبار _ زيت للتحمير _ لحمة مفرومة معصجة بالصلصة ._ بشاميل _ 1بيضة مضروبة بالشوكة للوجة .
ملح و فلفل اسود
الطريقة:
قشرى الباذنجان وقطعية دوائر بالعرض بس حاولى يكونو مقاس بعض . حطى كمية البذنجان على مصفاة و رشية كلة بالملح علشان ما يسودش و علشان يخرج مايته و ما يشربش ز يت كتير اثناء القلى يعنى حوالى عشر دقايق . سخنى الزيت فى مقلاية و حمرى البزنجان من الناحيتين ثم ضعيه فى مصفاة ليصفى الزيت اللى فية او ضعية على ورق الامتصاص لكي يتشرب الزيت .جهزى صينية او طبق فرن (بايركس) و رصصى فية نص كمية البزنجان ثم ضعى طبقة من العصاج بالصلصة ثم باقى كمية البزنجان .ضعى طبقة البشاميل على الوش و ساويها ثم ضعى بيضة مضروبة و ممكن رشة جبنة اى نوع عندك .دخليها الفرن تقريبا حوالى نص ساعة و بالهنا و الشفا.

عزومة أم ابيها
مكرونة بالباشميل
محاشي (كوسة- بذنجان- فلفل- ورق عنب)
رقاق باللحم
بيكاتا مع الرز
بفتيك
روزبيف او فخذة ضاني ايه رأيك؟
رز بالخلطة
ديك رومي او فراخ مشوية ايه رأيك؟
كبة شامي
ملوخية (عالسريع كده علشان باحبها)
شوربة كريمة بالفراخ
والسلطات
تبولة- فتوش- زبادي- حمص- بابا غنوج- مخلل
اما الحلو فناوية ان شاء الله اعمل بسبوسة
والعصائر
فراولة
جوافة باللبن

رد دون على عزومة أم ابيها
بصي يا ست الكل:
مكرونة بالباشميل : أنصحك رز بالخلطة هيبقى أحسن و أوفر في المجهود و أشيك
وممكن اللحمة المفرومة تعملي منها كفته (3 سرفيس)
محاشي (كوسة- بذنجان- فلفل- ورق عنب) اعملي منها الأتي:
1 كيلو كوسا + 3 كجم باذنجان + 1 كجم فلفل + 1 كجم ورق عنب
رقاق باللحم (2 سرفيس)
بيكاتا مع الرز (بلاش)
بفتيك (أفضل)
روزبيف او فخذة ضاني ايه رأيك؟ (فخدة ضاني عشان الرز اللي بالخلطة)
رز بالخلطة (تمام زي ما قلنا )
ديك رومي او فراخ مشوية ايه رأيك؟ (خليها فراخ بانيه احسن) = 2 كجم
كبة شامي = تمام (1 كجم عشان فيه كفته)
ملوخية (عالسريع كده علشان باحبها) = 1/2 كجم
شوربة كريمة بالفراخ
والسلطات
تبولة- فتوش- زبادي- حمص- بابا غنوج- مخلل
اما الحلو فناوية ان شاء الله اعمل بسبوسة
ممكن مع البسبوسة بما أنك عندك فواكه ممكن تعملي فروت سلاد و عليه كريم شانتيه بالمكسرات و نوع واحد من العصير
حتعملى الطبق الرئيسى من اللحوم ديك رومى وفخدة ضانى مع (كببة شامى وممكن تتعمل صينية او كفتة او فراخ محشية)كحاجة سنيدة ..
المحشى هو على العشاء بيفضل الورق عنب والفلفل المحشى عايزة تعملى بزنجان وكوسة ماشى بس على فكرة نقى البزنجان والكوسة بالواحدة من الراجل يعنى يكون طول الواحدة طول صابع ايدك ورفيع (اسمعى الكلام بيبقى اشيك )
الارز والمكرونات ..تعملى ارز بالخلطة طبعا وطبعا مكسرات على الوش( ومتنسيش تحمريها) ومعاه لازانيا عايزة تكتفى بواحدة خلاص تبقى باللحمة المفرومة عايزة تعملى اتنين يبقى التانية بالسبانخ والكريمة . وممكن تعملى كبسة بدام عندك فخدة
الخضار ملوخية مع كوسة بالزبادى حيبقى مية مية مع كل الاصناف اللى فوق وممكن بطاطس صغيرة محشية لحمة مفرومة
وياريت لو تعملى كشك مية مية

اللحوم:
ديك رومي (كم كيلو؟ 10 كويس؟) اة كويس مش اقل علشان تبقى طبلته حلوة ومليانة
فخذة ضاني (ولو اني رجعت فكرت مش كل الناس بتحب الضاني- تفتكري في بديل حلو؟)
بفتيك
انتم قلتم بلاش البيكاتا طيب ينفع شرائح انتركوت في الصينية ؟ بدل البيكاتا
اةةة صينية انتركوت فى منتهى الشياكة
كبة شامي (كيلو مثلا ؟)تماااام
المحاشي وعلى فكرة هيكون عزومة على الغذاء غالبا
2 كيلو كوسة، 2 بذنجان، 1 فلفل، 1 ورق عنب تماااامالمكرونات والنواشف:
مكرونة بالباشميل (2 صينية مستطيلة متوسطة علشان يكفي)تمام بس خليها طرية وحلوة
2 صينية رقاق باللحم ..تمااام بس متقطعيهوش قطع كبيرة يافطوم
فكرة الكشك هايلة بس اعمل قد ايه 4 اطباق تقديم مثلا ؟ تمااام رز بالخلطة والمكسرات طبعا (تفتكري لازم صنوبر معها؟)لوز وبندق دول اساسى بس متنسيش تديهم تحميرة وممكن عين جمل وممكن شوية كبدوكلاوى
الملوخية الشهيرة
عاوزة اعمل فتة فراخ ايه رأيك؟ ممكن وانا ممكن اعملهالك الاول واصورهالك الحلو
رجعت في كلامي ممكن اعمل ايه بدل البسبوسة يكون شكله شيك في التقديم؟ بصى يا فطومة بصراحة كدة يعتبر الاكل دسم ورائع وحيشبعوا والجو حر انا من رأيى واللى يعجبك طبعا تورتة ايس كريم او فروت سلاط بالايس كريم ولا اية ؟؟؟زى ماانتى عاوزة
والسلطات اللي قلتها والعصائر زى ما قلت ايه رايك؟ ماتنسيش السلطة الخضراء لان السلطات التانية لاتغنى عنها ابدا

بتجيبى اللحمة الانتركوت شرايح طويلة زى ماهى وبنعملها بالبصل بطريقة الفيلية بالضبط يعنى بتجيبى الصينية وتحطى فيها شوية زيت (لان الانتركوت بينزل سمنته او دسمه) بتضعى البصل لحد مايدبل وتروحى حطة الانتركوت تقلبيه على الوشين لحد ماياخد اللون البنى تروحى نازلة بشوية شوية ماء مع الملح والفلفل والبهارات لحد مايستوى وخلى فية فى الاخر صوص بنى وممكن بعد ماتطفى تعصرى نقطتين ليمون وبالف هنا وشفا وممكن ترمى معاه فى الصينية كام مكعبة بطاطس بتطلع لونها بنى وطعمها جميل (ملحوظة من دون عن اللحمة الانتركوت)

لقمة القاضى (دون)
نص كيلو دقيق _1 ملعقة صغيرة سكر _ ملعقة كبيرة خميرة فورية _ زرة ملح _ زيت للقلى _ شربات .ماء (حوالى كوب)
الطريقة:
_ جهذى المضرب الكهرباء
_ ضعى فى طبق غويط بلا ستيك الدقيق، الملح، السكر والخميرة. و اخلطيهم مع بعض بالملعقة و شوية شوية ماء وشغلى الى ان تحصلى على عجينة ثقيلة متوسطة. غطى العجينة واتركيها فى مكان دافئ لمدة ساعة تقريبا ليتضاعف حجمها. ولما تيجى تستخدميها اخلطى العجينة الاول تانى بأيدك . سخنى زيت فى مقلاية عميقة. _بملعقة صغيرة بليها بزيت ثم خدى من العجينة بالملعقة يادوب كرة صغيرة ثم ضعيها فى الذيت الساخن. قلبى بالكبشة لحد ما تصفر وحطيها فى مصفاة تصفى منها الذيت ثم حطيها فى العسل البارد و بالهنا و الشفا .
ملحوظة : اذا كنتى مش حتستعملى خميرة فورية و حتستخدمى خميرة بيرة عادية يبقى ضعى الخميرة و السكر و ربع كوب ماء دافىء فى كوب و قلبيهم بالملعقة وسيبيهم شوية يخمروا و بعدين اتبعى نفس الطريقة اللى فلنا عليها . ملحوظة : بعد الزيت مايقدح وتيجى تنزلى لقمة القاضى فية علشان تتحمر تروحى موطية النار

كوردون بلو (دون)
نص كيلو صدور فراخ مخلية ( او حسب العدد المطلوب) _ بقسماط _2 بيضة مضروبة بالشوكة +ملح _ فلفل _شرائح جبنة شيدر او جبنة موزاريلا +زيت للتحمير _ زيتون اسود او اخضر
الطريقة
تفتح صدور الدجاج بالطول بالسكينة بس ما تفصليهاش عن بعض يعنى تبقى ممسوكة من جنب واحد ،
تتبل بالملح و الفلفل. تفرد كل شريحة دجاج نضع شريحة جبن على نصف شريحة الدجاج ثم زيتون اسود ثم شريحة جبن أخرى. يقفل نصف شريحة الدجاج الآخر فوقهم يعنى كانك حشينى سندويتش و يضغط عليه عشان نتاكد انه اتقفل كويس. تكررنفس العملية مع باقي شرائح الدجاج. يوضع فى البيض المخفوق ثم يوضع فى البقسماط .مع الضغط جيدا باليد. رصى بقى الدجاج بعد ما خلص و حطية حوالى نص ساعة فى الثلاجة .يسخن الزيت فى مقلاية كبيرة ثم يحمر الدجاج (الكوردون بلو) على الجانبين حتى يصبح ذهبى اللون. ليكى حرية الاختيار فى الحشو يعنى ممكن شريحة سلامى مع الجبنة و الزيتون وممكن بصل و فلفل رومى مع الجبنة و ممكن شرائح سوسيس.وبالهنا والشفا

ملحوظة : سر فى عمل الكوردن بلو ..( مووووووتي )
علشان تخلية واسع من جوة ويطلع مفرغ من جوة زى بتاع برة السر هو: الخلطة اللى بتحطيها جواة (الزبد والجبنة والبقدونس والتوم) اولا تخلطيها مع بعض لحد ما تبقى عجينة متماسكة ..وبعدين تشكليها صوابع بالتخن اللى انتى عاوزاة وتحطيعا على شريحة الدجاج وتبرمى بكدة الشرائح ها تديكى نفس شكل صوابع الحشو.....
سر الكوردن بلو انك تحطى الزبدة وهى جامدة تخلطيها يالاضافات اللى انتى عاوزاها. يعنى زبدة مع بقدونس وشوية زيتون مخلل وجبنى شيدر.. وبعد كدة تحطيها فى الثلاجة لحد ما تبقى جامدة وبعد كدة تحشى بيها الفراخ وتلفى ,, زى طريق دون بالظبط. اية بقى اللى بيحصل الزبدة لما بتكون جامدة بتاخد حيز كبييير وتلف الصدور عريضة. لما بتحطيها على النار وتسيح الحيز اللى كانت واخداة وهى جامدة بيفضى لانها ساحت بالتالى يطلع الكودن بلو واسع ومجوف من جوة زى بتاع برة ومش مكتوم ومحشى ... (مووتي)

مكرونة بالفراخ (دون)
كيس مكرونة (500 ج)
فرخة مسلوقة ومقطعه
جبنة مبشورة
بشاميل خفيف
ملح وفلفل
معلقة بقسماط ناعم
قطعة زبد صغيرة
الطريقة
نسلق المكرونة عادى ونصفيها (ممكن تستعملى مكرونة بايتة). نسلق الفراخ ونخليها من الجلد والعظم ونقطعها حسب الرغبة. ندهن صينية بالسمن ونضع طبقة من الفراخ ثم فوقها طبقة من المكرونة ثم فوقها طبقة من البشاميل ثم طبقة من الجبنة ونكرر تانى طبقة فراخ وعليها مكرونة وعليها بشاميل وعليها جبنة ثم رشة بقسماط وحتة زبدة صغيرة ندخل الصينية الفرن لحد ماتستوى وتحمر وبالهنا والشفا
ملحوظة: ممكن تعملى طبقة فراخ وطبقة لحمة او طبقة سجق او طبقة بولوبيف

المسقعة الدايت للرجيم (دون)
كيلو بزنجان اسود
ربع كيلو لحمة مفرومة
ملح وفلفل
بصلة متوسطة
عصير طماطم طازج
الطريقة
قشرى البزنجان وقطعية عادى شرائح وضعية على الشوابة من الناحيتين . اعملى العصاج خرطى البصلة فى المقلاية بدون زيوت ثم ضعى اللحمة المفرومة وقلبى قلبى مع الملح والفلفل لحد ماتستوى . رصصى شرائح البزنجان المشوية فى صينية ثم ضعى عليها العصاج ثم ضعى عصير طماطم ودخليها الفرن لحد ماتستوى حتلاقى طعمها جميل وخفيفة وبدون زيوت خالص واخف من المسقعه العادية وبالهنا والشفا

البطاطس المحمرة للريجيم (دون)
بطاطس حسب رغبتك
ملح
وممكن كارى
وممكن بودرة ثوم
رشة خفيفة زيت
الطريقة
نقشر البطاطس ونقطعها اصابع او شيبس. نغلى ماء على النار كويس ثم نضع فيها البطاطس حتلاحظى ان الماء وقفت الغليان . اتركى فيها البطاطس لحد ماتغلى تانى وبعد ماتغلى ب5 او عشر دقائق فقط حسب كمية البطاطس تشيلى البطاطس من الماء وتضعيها فى المصفاة . افرشيها على صينية او صاجة الفرن ورشى عليها ملح وانا برش رشة كارى ورشة بودرة ثوم بتديها طعم جميل وممكن رشة صغيرة زيت وقلبى كله ببعض ودخليها الفرن يادوب لحد ماتلاقيها اصفرت واخدت نفس لون البطاطس المحمرة العادية وبالهنا والشفا

بالنسبة لبودرة الثوم موجودة فى كل حتة وفى كل سوبر ماركت حتلاقيها بلاستيك وصغيرة او متوسطة وانا جربت نوعين فقط وكانوا حلوين بس مش عارفة احطلك اسمهم لان مش مكتوب بالعربى غير صنع فى باكستان والباقى كتابة مش فهماها وهى تقريبا ب 4 او 5 جنية (ملحوظة من دون)

اما البشاميل فتحطى الاول معلقتين سمنة لحد ماتسيح وتروحى حاطة معلقتين دقيق وتقلبيهم تقليبتين وتروحى نازلة بالحليب مع التقليب السريع علشان ميكلكعش لحد التخانة اللى انتى عيزاها وقبل ماتطفى تحطى الملح والفلفل وبيضة او بيضتين وشوية جبنة مبشورة اى نوع .تكون النار متوسطة مش عالية والفرن متوسط يعنى على 180 او 200 وخلى بالك ان البشاميل لما بيقعد بيتخن (ملحوظة من دون)

اذا كانت السمكة التونة اللى عندك لحمها احمر يبقى لازم تتنقع الاول فى ماء وملح وخل لمدة لاتقل عن ساعة علشان كل الدم والزفر اللى فيها ينزل خالص خالص ولونها يبيض تلاقى لحمها بقى ابيض واذا كانت لحمها ابيض يبقى تغسليها بس كويس بالماء والملح . المهم بعد كدة تروحى مقطعاها شرائح مش تخينة وتتبليها ملح وكمون وليمون وثوم وتخليها شوية فى التتبيلة وبعدين تحطيها فى دقيق وتقليها فى زيت وبالهنا والشفا (ملحوظة من دون)

سمك هامور بكريمة جوز الهند (رحوبة)
المقادير
نصف كيلو سمك هامور فيليه مقطع شرائح متوسطة الحجم
2طماطم_2بصل_1فلفل اخضرمتوسطي الحجم
زيت _نصف ليمونة _معلقتين كبار كمون_2 فص ثوم_ملح_فلفل
مقادير الصوص
معلقة كبيرة دقيق_3ملاعق كبيرة جوز الهند_معلقتين زيت_ملح_فلفل
الطريقة
في صينية نقطع البصل والفلفل والطماطم الى شرائح رفيعة جدا ونضع معهم قطع السمك ونتبلهم بال كمون والزيت والليمون ونراعي الا يكون الليمون كثير ونضع الفصين الثوم المفرومين والملح والفلفل ونقلبهم كلهم مع بعض كويس ونضع الصينية في الفرن هي هاتستوي على طول واهم حاجة حاتنزل مايتها
ملاحظة هامة اوعي تسيبيها في الفرن لحد م